ກອງປະຊຸມກາງສະໄຫມ ຂອງໜ່ວຍພັກຄົ້ນຄວ້າ-ສັງລວມ ຄັ້ງທີ II ໄດ້ໄຂຂຶ້ນໃນລະຫວ່າງວັນທີ 16-18 ພຶດສະພາ 2023, ຢູ່ທີ່ຫ້ອງປະຊຸມຫ້ອງວ່າການແຂວງ ຊັ້ນ 3, ພາຍໃຕ້ການເປັນປະທານຂອງ ສະຫາຍ ນາງ ຈັນປິງ ໂສລະທີ ຮອງເລຂາຄະນະພັກຮາກຖານ, ເລຂາໜ່ວຍພັກຄົ້ນຄວ້າສັງລວມ, ເຊິ່ງມີຜູ້ເຂົ້າຮ່ວມກອງປະຊຸມທັງໝົດ 19 ສະຫາຍ, ຍິງ 6 ສະຫາຍ ໃນນີ້, ມີແຂກຖືກເຊີນເຂົ້າຮ່ວມ 3 ສະຫາຍ ມາຈາກຄະນະກວດກາພັກ-ລັດແຂວງ, ຄະນະຈັດຕັ້ງແຂວງ, ຄະນະໜ່ວຍພັກທີ່ຂຶ້ນກັບຄະນະພັກຮາກຖານຫ້ອງວ່າການແຂວງ ແລະ ກອງປະຊຸມໃຫ້ກຽດຕ້ອນຮັບການນໍາຂອງແຂວງ ມີ 3 ສະຫາຍ ຄື: ສະຫາຍ ເລຂາພັກແຂວງ; ສະຫາຍ ປະທານຄະນະກວດກາພັກ-ລັດແຂວງ ແລະ ສະຫາຍເລຂາຄະນະພັກຮາກຖານຫ້ອງວ່າການແຂວງ ແລະ ໄດ້ຮັບຟັງຄໍາເຫັນໂອ້ລົມ ຊີ້ທິດເຍື່ອງທາງ ຈາກສະຫາຍຄະນະພັກຂັ້ນເທິງ. 

ກອງປະຊຸມກາງສະໄຫມ ຄັ້ງນີ້ ແມ່ນໄດ້ສຸມໃສ່ ສະຫຼຸບຕີລາຄາສະພາບການນໍາພາ-ຊີ້ນໍາ, ຈັດຕັ້ງຜັນຂະຫຍາຍເນື້ອໃນຈິດໃຈຂອງມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ, ມະຕິ ຄັ້ງທີ VI ຂອງອົງຄະນະພັກແຂວງ ແລະ ມະຕິ ຄັ້ງທີ II ຂອງໜ່ວຍພັກ ຕິດພັນກັບການສະຫຼຸບຕີລາຄາຄືນດ້ານວິຊາສະເພາະຂັ້ນຂອງຕົນ ແລະ ການທາບທາມຄວາມໄວ້ວາງໃຈຕໍ່ຄະນະພັກ ໃນການຍົກສູງຄວາມຮັບຜິດຊອບ, ສາມາດນໍາພາ, ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນໄລຍະຜ່ານມາ ລົງເລິກໃນການສໍາຫຼວດການນໍາພາຂອງຄະນະໜ່ວຍພັກ ໄລຍະກາງສະໄຫມ ໃນການກວດກາ, ຕີລາຄາຄຸນນະພາບ ຂອງການນໍາພາ-ຊີ້ນໍາ, ປະຕິບັດກົດລະບຽບຂອງພັກ, ມະຕິ-ຄໍາສັ່ງ ຂອງສູນກາງພັກ, ການສ້າງພັກທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນໍາພາຂອງຄະນະພັກ ຕາມທິດສ້າງພັກໃຫ້ປອດໃສ, ເຂັ້ມແຂງ, ຫນັກແຫນ້ນ ຕິດພັນກັບການສໍາຫຼວດການນໍາພາລວມ ຂອງຄະນະໜ່ວຍພັກ ແລະ ບົດສໍາຫຼວດຂອງບຸກຄົນສະມາຊິກພັກພາຍໃນໜ່ວຍພັກ.

1. ໄດ້ຄົ້ນຄວ້າ ແລະ ຮັບຮອງເອົາບົດສໍາຫຼວດການນໍາພາລວມຂອງຄະນະໜ່ວຍພັກ ໃນໄລຍະຜ່ານມາ ຕິດພັນກັບການຜ່ານບົດສໍາຫຼວດຂອງບບຸກຂອງສະມາຊິກພັກ ພ້ອມທັງຮັບຮອງເອົາໜ້າທີ່, ຂອບເຂດການນໍາພາແຕ່ກອງປະຊຸມກາງສະໄໝນີ້ ຮອດກອງປະຊຸມໃຫຍ່ຂອງໜ່ວຍພັກ ຄັ້ງທີ III ປີ 2025 ດ້ວຍຄວາມເປັນເອກະພາບສູງຕໍ່ທິດທາງແຜນການຈັດຕັ້ງປະຕິບັດໃນຕໍ່ຫນ້າ. ຜ່ານການຄົ້ນຄວ້າ, ປະກອບຄໍາເຫັນຕໍ່ບົດສໍາຫຼວດການນໍາພາຂອງຄະນະໜ່ວຍພັກ, ພວກເຮົາ ສາມາດຕີລາຄາໄດ້ຈຸດດີ, ຈຸດອ່ອນ, ຂໍ້ຄົງຄ້າງຈໍານວນຫນຶ່ງ ທີ່ຕ້ອງໄດ້ເອົາໃຈໃສ່ປັບປຸງແກ້ໄຂດັ່ງນີ້:

- ເພີ່ມທະວີແບບແຜນນໍາພາ ແລະ ວິທີເຮັດວຽກ ຂອງຄະນະພັກໃຫ້ເປັນລະບົບຕໍ່ເນື່ອງ ເພື່ອປັບປຸງແກ້ໄຂໃນການຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝຂອງພັກ, ເຮັດວຽກພັກໄປຕາມຫຼັກການລວມສູນ ປະຊາທິປະໄຕ ເປັນໝູ່ຄະນະ ຕາມ 5 ຫຼັກການ 3 ທິດນໍາຂອງພັກ.

- ເພີ່ມທະວີຄວາມສາມາດ ແລະ ບົດຮຽນໃນການສຶກສາອົບຮົມທາງດ້ານການເມືອງ-ແນວຄິດໃຫ້ແກ່ສະມາຊິກພັກ, ພະນັກງານ-ລັດຖະກອນ ໃຫ້ມີຄວາມຕື່ນຕົວໃນການຊອກຮູ້ຮໍ່າຮຽນ ເຊື່ອມຊຶມກໍາແໜ້ນບັນດານິຕິກໍາຕ່າງໆ ຂອງພັກ-ລັດ ວາງອອກແຕ່ລະໄລຍະ ຢ່າງເປັນປົກກະຕິຕໍ່ເນື່ອງ.

- ເພີ່ມທະວີການນໍາພາ, ຈັດຕັ້ງ, ເຊື່ອມຊຶມ ແລະ ຜັນຂະຫຍາຍແນວທາງນະໂຍບາຍ ຂອງພັກ-ລັດ, ການສຶກສາອົບຮົມການເມືອງ - ແນວຄິດໃຫ້ແກ່ສະມາຊິກພັກ ໃຫ້ເລິກເຊິ່ງ, ມີຫຼາຍຮູບ ຫຼາຍສີ, ຊອກໃຫ້ເຫັນບັນຫາຈຸດອ່ອນ-ຂໍ້ຄົງຄ້າງ ເພື່ອນໍາປັບປຸງແກ້ໄຂໃຫ້ດີຂຶ້ນເປັນກ້າວໆ. 

- ເພີ່ມທະວີການຕິດຕາມ, ກວດກາ, ການຕໍານິຕົນເອງ, ຕໍານິຕິຊົມເຊິ່ງກັນ ແລະ ກັນ ຢ່າງແຂງແຮງໃນເວລາດໍາເນີນຊີວິດການເມືອງ ພາຍໃນໜ່ວຍພັກ ດ້ວຍຄວາມຈິ່ງອົກ ຈິ່ງໃຈ, ກ້າເວົ້າ, ກ້າເຮັດ, ກ້າຕໍານິສົ່ງຂ່າວ ຊ່ວຍເຫຼືອກໍ່ສ້າງເອົາກັນ.

- ເອົາໃຈໃສ່ ການສໍາຫຼວດກວດກາ, ຕີລາຄາຄຸນນະພາບ, ຈັດປະເພດສະມາຊິກພັກ ສຸມປີຜ່ານມາ, ເຖິງວ່າມີສະມາຊິກພັກເຂົ້າຮ່ວມຄົບຖ້ວນ, ແຕ່ຄຸນນະພາບ ຍັງບໍ່ທັນສູງ, ການໃຫ້ຄະແນນ ແລະ ຈັດປະເພດສະມາຊິກພັກດ້ວຍກັນ ຈໍານວນຫນຶ່ງຍັງຖືເບົາ. 

ກອງປະຊຸມໄດ້ຮັບຟັງການໂອ້ລົມຈາກ ສະຫາຍ ຄໍາເກິ່ງ ຜີວວັນນາ ກໍາມະການພັກແຂວງ, ເລຂາຄະນະພັກຮາກຖານຫ້ອງວ່າການແຂວງ, ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ຂອງຄະນະພັກໃນຊີ້ນໍາ-ນໍາພາວຽກງານກໍ່ສ້າງພັກ-ພະນັກງານ; ການປະຕິບັດຫນ້າທີ່ການເມືອງ ຂອງຄະນະພັກ, ສະມາຊິກພັກ ຕະຫຼອດໄລຍະຜ່ານມາ, ເຫັນໄດ້ວ່າສາມາດຍາດໄດ້ຜົນງານ, ຜົນສໍາເລັດຫຼາຍດ້ານ ພ້ອມກັນນັ້ນ ກໍ່ຍັງໄດ້ສະແດງເຖິງຄວາມເປັນຫ່ວງເປັນ​ໃຍຕໍ່ຄະນະພັກ, ສະມາຊິກ ໃນການສືບຕໍ່​ແກ້​ໄຂດ້ານອ່ອນ, ຂໍ້ຄົງຄ້າງ ທີ່ສ່ອງແສງລາຍງານ ແລະ ການປະກອບຄໍາຄິດເຫັນ ຜ່ານໄປແລ້ວນັ້ນ ສະຫາຍຍັງໄດ້ຮຽກຮ້ອງໃຫ້ຄະນະໜ່ວຍພັກ, ສະມາຊິກພັກ ຈະຕ້ອງໄດ້ສືບຕໍ່ປັບປຸງ, ແກ້ໄຂບາງບັນຫາດັ່ງນີ້: 

• ສືບຕໍ່ສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພັກໃຫ້ເລິກເຊິ່ງເຖິງຖອງ ຄືດັ່ງພວກເຮົາໄດ້ຕີລາຄາໃນບົດສໍາຫຼວດການນໍາພາລວມຂອງຄະນະພັກ.
• ສືບຕໍ່ປັບປຸງທັດສະນະຫຼັກໝັ້ນການ​ເມືອງ​ໃຫ້​ໜັກ​ແໜ້ນ, ປັບປຸງແບບແຜນການນໍາພາ ແລະ ປັບປຸງແບບວິທີເຮັດວຽກໃຫ້ຖືກຕາມຫຼັກການລວມສູນປະຊາທິປະໄຕ; ​ປັບ​ປຸງ​ທັດ​ສະ​ນະ​ແນວ​ຄິດ​ ທີ່​ຍັງ​ເປັນ​ບັນ​ຫາ​ກົດ​ໜ່ວງ​ຖ່ວງ​ດຶງ​ໃຫ້​ແກ່​ການຈັດຕັ້ງປະຕິບັດວຽກງານຕົວຈິງຂອງຕົນເອງ; ​ຕ້ານ ແລະ ແກ້ໄຂ​ໃຫ້​ໄດ້​ແນວ​ຄິດປຽບທຽບ​​ຊັ່ງຊາ, ອິດ​ສາ​ບັງ​ບຽດ; ຄະນະພັກ, ສະມາຊິກພັກ ຕ້ອງຮູ້ເຮັດວຽກພັກ.
• ສືບຕໍ່ຍົກສູງ​ຄວາມ​ຮັບ​ຜິດ​ຊອບ​ຕໍ່​ໜ້າ​ທີ່​ການ​ເມືອງ​ຂອງ​ຕົນ, ກ້າ​ເຮັດ, ກ້າ​ຮັບ​ຜິດ​ຊອບ, ກ້າ​ຕັດສິນ​ໃຈ ພ້ອມທັງຍົກ​ສູງ​ບົດ​ບາດ​ການ​ນຳ​ຂອງ​ພັກ; ຖັນ​ແຖວ​ສະ​ມາ​ຊິກ​ພັກ, ພະ​ນັກ​ງານ, ເສີມສ້າງ​ຄວາມ​ສາ​ມັກ​ຄີຮັກແພງ ອັນແໜ້ນແຟ້ນ ໃຫ້ເປັນປຶກແຜນແໜ້ນໜາ, ​ເປັນ​ເອ​ກະ​ພາບ​ສູງໃນ​ການ​ເຄື່ອນ​ໄຫວ​ປະ​ຕິ​ບັດ​ໜ້າ​ທີ່​ວິ​ຊາ​ສະ​ເພາະ​ຢ່າງ​ມີ​ປະ​ສິດ​ທິ​ພາບ ແລະ ປະ​ສິດ​ທິ​ຜົນ;
• ສືບຕໍ່ເສີມ​ຂະ​ຫຍາຍ​ຄວາມ​ເປັນ​ແບບ​ຢ່າງ​ນຳ​ໜ້າ, ຄວາມເປັນ​ເຈົ້າ​ການ​ ໃນ​ການ​ປະ​ຕິ​ບັດ​ໜ້າ​ທີ່​ວິ​ຊາ​ສະ​ເພາະ​ຂອງ​ຕົນໃຫ້​ສູງ​ກວ່າເກົ່າ, ເອົາໃຈໃສ່ຈັດຕັ້ງປະຕິບັດແຜນການປະຈໍາປີ 2023 ພ້ອມກັນເຮັດຫຼ້ອນໜ້າທີ່ການເມືອງ ທີ່ຄະນະພັກຂັ້ນເທິງມອບໝາຍໃຫ້ ໂດຍສະເພາະແມ່ນເຮັດສໍາເລັດການເປັນເສນາທິການໃຫ້ແກ່ການນໍາ ​ແລະ ຫັນ​ເປັນ​ທັນ​ສະ​ໄໝ​ເທື່ອ​ລະ​ກ້າວ;