ໃນລະຫວ່າງວັນທີ 13-14 ກັນຍາ 2016 ຫ້ອງວ່າການແຂວງບໍ່ແກ້ວ ໄດ້ເດີນທາງແຂວງຜົ້ງສາລີ ເພື່ອພົບປະແລກປ່ຽນບົດຮຽນ ວຽກງານຫ້ອງວ່າການ, ນຳພາໂດຍທ່ານ ເພັງສອນ ແກ້ວວິໄລ ຫົວໜ້າຫ້ອງວ່າການແຂວງບໍ່ແກ້ວ ພ້ອມດ້ວຍພະນັກງານຫ້ອງວ່າການແຂວງ ທັງໝົດ 17 ທ່ານ. ໃຫ້ກຽດຕ້ອນຮັບ ໂດຍທ່ານ ຫົວໜ້າ ຫ້ອງວ່າການແຂວງຜົ້ງສາລີ ພ້ອມດ້ວຍພະນັກງານຫ້ອງວ່າການແຂວງ ຕ້ອນຮັບຢ່າງອົບອຸ່ນ.
ໃນການພົບປະຄັ້ງນີ້, ທັງສອງຝ່າຍ ໄດ້ສຸມໃສ່ແລກປ່ຽນບາງບົດຮຽນທີ່ສຳຄັນ ເປັນຕົ້ນ ການເປັນເສນາທິການ ໃນການກະກຽມສ້າງແຜນການ ແລະ ໂຄງການເຮັດວຽກ ໃຫ້ແກ່ການນຳ, ການຄົ້ນຄວ້າສັງລວມ ແລະ ສະໜອງຂໍ້ມູນຂ່າວສານທີ່ຈຳເປັນ ໃຫ້ແກ່ການນຳ, ການຍົກສູງຄຸນນະພາບ ແລະ ຄວາມຮັບຜິດຊອບ ໃນການຄົ້ນຄວ້າຕົກລົງບັນຫາຕ່າງໆ, ການຊ່ວຍການນຳ ໃນການປະຊາສຳພັນ ແລະ ແກ້ໄຂຄຳສະເໜີ ຂອງຂັ້ນລຸ່ມ ແລະ ປະຊາຊົນຕໍ່ການນຳ, ການຄຸ້ມຄອງວຽກງານສາລະບານເອກະສານ, ການປະສານສົມທົບກະກຽມ ບົດຄຳເຫັນ-ບົດໂອ້ລົມຕ່າງໆ ໃຫ້ການນຳ, ການຕອບສະໜອງພາຫະນະ ວັດຖຸ-ອຸປະກອນ ແລະ ງົບປະມານ ໃນການຮັບໃຊ້ການເຄື່ອນໄຫວວຽກງານຕ່າງໆຂອງການນຳ, ກ່ຽວກັບລະບົບການຈໍລະຈອນເອກະສານ ແລະ ວຽກງານອື່ນໆ ທີ່ຕ່າງຝ່າຍຕ່າງໃຫ້ຄວາມສົນໃຈ. ເຊິ່ງທັງສອງຝ່າຍ ກໍ່ໄດ້ລາຍງານໃຫ້ຊາບ ການຈັດຕັ້ງປະຕິບັດວຽກງານໃນຂົງເຂດຂອງຕົນ ໃນໄລຍະຜ່ານມາ ພ້ອມທັງດ້ານດີ, ດ້ານອ່ອນ ແລະ ບາງບົດຮຽນທີ່ຖອດຖອນໄດ້ ໂດຍຫວັງຢ່າງຍິ່ງວ່າ ການແລກປ່ຽນບົດຮຽນໃນຄັ້ງນີ້ ຈະສາມາດນຳໄປໝູນໃຊ້ ໃນຂົງເຂດວຽກງານຂອງຕົນ ໃຫ້ເກີດປະສິດທິພາບ ແລະ ປະສິດທິຜົນສູງສຸດໃນຕໍ່ໜ້າ. ໃນໂອກາດກ່າວ ຄະນະທີມງານ ກໍໄດ້ໄປທ່ຽວຊົມເຄື່ອນໄຟຟ້ານ້ຳອູ 5, ພູຟ້າ, ຊົມທີວທັດ ຕົວເມືອງຜົ້ນສາລີ.